Toes

Ger Frenken 6-voudig buuttekampioen, receptie op zunjig 29 jannewari

Op vriedig 13 jannewari is Ger Frenken väör de zesdje kiër Groeat Limburgs Buuttekampioen gewaore. Mèt zien creatie “De Sjöttekäöningin” haoldje hae de meiste puntje in ‘n oetverkochtje Oranjerie in Remunj. ‘n Unieke prestatie want Ger is daomèt de einigste dae deze titel 6 kiër gewònne haet. CV De Sjansemaekers is gruets op deze echte Roggelse jòng. Om ederein in de gelegenheid te stèlle om Ger persuenlik te felicitere mèt dees unieke gebäörtenis, waerdj oze Buuttekampioen ’n receptie aangebaoje. Dees receptie waerdj gehaoje op zunjig 29 jannewari van 17.00 oor toet 20.00 oor in La Rochelle. Gae zeetj van herte oetgenuedigdj om Ger te kome felicitere mèt ziene titel.

Ger Frenken as Sjötterskäöningin

Sjanse Spaβ Spektakel

De haas en de olieböl zeen opgegaete en de hendjes väör ’t noewe jaor zeen gesjödj. ’t Jaor 2012 kèn beginne. Dao is den toch niks sjoeaner om den snel genòg weer ’n fiëstje te höbbe. Al ’n tiedje is d’r ‘nne groep bie-eingeraapdje jeugd bezig om ’n noew fiëst oftewaal  Das Sjanse Spaβ Spektakel i.s.m. de Sjansemaekers te organisere. Dit fiëst geit plaats vinje op zaoterdig 28 jannewari in La Rochelle. ’t Waerdj ‘nne aovendj väör jòngk en aod en zal beginne òm 20.30 oor. Tiejes deze aovendj zal d’r live Deutsche Stimmungsmuzik gemaaktj waere door 2 artiesteduo’s. De rest van de aovendj zal ’t publiek door ‘nne DJ väörzeen waere van de nuedige bekindje Duitse klanke. De rest van de aovendj zal d’r ’t ein en ’t anger gebäöre mer dao-äöver wille wae hie nog niks kwiet. ’t Belaoftj in eder geval get gezelligs te waere.. Om d’r ’n groeat Spaβ spektakel van te make en ’t zoea Duits mäögelik te kriege, haope wae det t’r zoea väöl mäögelik miense in gepasje Duits/Tiroler kleijer kome, väör dees miense is d’r ’n verrassing bie de ingang. Verkleije is neet verplicht, mer ‘t is waal sjiek as gae det doot. D’r is geine entree, dus waat lètj uch om te kome.. Dus toet den !

Klik hie väör de poster.

Seniore Bòntje Middig

Op woonsdig 8 fibrewari is ‘t zoea wiet, den trappe de Sjansemaekers häör bòntje waek aaf mèt de Seniore Bòntje Middig. Vanaaf twië oor toet ongeviër half vief traeje diverse artieste väör uch op mèt zang, dans en kolder.  Nateurlik zal oze zesvoudig buuttekampioen Ger Frenken neet ontbraeke. Ouch zal d’r ‘n optraeje zeen van Thei en Marij oet Venlo. Väör de pries van € 3,50 höbtj gae ‘nne sjoeane middig mèt koffie en vlaai. De zaal is aope vanaaf 13.00 oor, miense die persé wille aitte raoje wae aan òm oppe tied te kome want La Rochelle is flink gekrompe, dus vol=vol. Ederein vanaaf 55 jaor en aojer is welkom (Oet Roggel en Heibloom) is op deze middig van herte welkom. Koomtj allemaol, den make wae d’r same mèt Prins Fred I en ziene alwieze raod weer ‘nne geweldjige middig van.

Bòntje Aovendje

Op vriedig 10 en zaoterdig 11 fibrewari zeen de Bòntje Aovendje van CV de Sjansemaekers in gemeinsjapshoes La Rochelle. Zoea wie det gae van òs gewindj zeeth, is ‘t weer ‘nne sjoeane mix van boete dörpse en eige artieste. ‘t Is òs al ‘n paar jaor gelöktj om de buuttekampioen op de Roggelse Bòntje Aovendj te laote optraeje. Dit jaor is det ouch weer gelöktj. Mer wae zeen d’r extra gruets op det hae ouch nog oet ‘t eige dörp kumptj. Dus wiltj gae Ger Frenken mèt zien buut “Gerda de Sjöttekäöningin” zeen, zorg den det gae ‘n kaertje höbtj. Mer Ger traedj neet allein op. Wae höbbe La Bamba en de Two Petjes as boetedörpse artieste en oet eige geledere DéDé Dance Ballet, 3 hiële en eine halve, Suus en Daan, Hoondervel, Vanne Straot, Zuusse Waal, Eine mèt en eine zonger, Busardo, CJ en de M&M’s en Minder en Niks (winaar SLK). Det alles zeen de ingrediente väör eine sjoeane aovendj mèt sjaele kal, meziek en dans. Mer den mòtj gae waal ‘n kaertje höbbe. Ouch in ‘t noewe La Rochelle geldtj vol is vol en det is vlotter vol as ‘t aoje La Rochelle. De kaertjes kintj gae koupe op zunjig 5 fibrewari tösse 16.00 en 17.00 oor bie Café Tonvannebekker mèt Gemma. Per persoean waer maksimaal 4 kaarte verkocht en kòste € 12,50 per stök.

KinjerBòntjeMiddig

Op zunjig 12 fibrewari waerdj de KinjerBòntjeMiddig gehaoje. Dao zeen al väöl aanmeljinge van deilenmers. Asse nog mèt wils doon, steur den ‘nne e-mail nao Carla Konings (carlakonings@hotmail.com) of Marleen Korsten (eldonno@ziggo.nl). Vermeldj in diene e-mail waat gae wiltj doon (zang, dans, sketch, buut enz.), waem det t’r mèt duit en ‘n tillefoonnummer. Den zal snel daonao kontakt opgenaome waere.

Minder & Niks winnaar SLK

Minder & Niks (Jos Cauven en Geert Brunen) höbbe op zaoterdig 7 jannewari ‘t SLK 2012 gewonne. ‘t Leedje “Sjoean Pöpke” kraeg de meiste stumme van ‘t publiek. Op de twiëdje plaats eindigdje de Coene-bölkes mèt ‘t nummer “‘t is alsof de duvel d’r mèt speeltj”. As derdje eindigdje de Triangelband mèt ‘t nummer “Daag Sjansemaekers hallo !” ‘T waas ‘n prachtig SLK mèt mer leefst 11 deilnemers. De jury (Prins Fred I, Pieter Steenvoorden, Truus Theelen, Pestoear Schwillens en Gemma v.d. Beucken) haaj de zwaor taak om 5 deilnemers door te laote gaon nao de finale. Tössedoor waas d’r ‘n prachtig optraeje van Neppie Kraft. Al mèt al ‘nne sjoeane en gezellige aovendj mèt ‘nne terechte winnaar. Loester bie filmkes en audio nao ‘t winnendje leedje.

De winnaars van 't SLK Geert Brunen en Jos Cauven

Prins Fred I

Op zunjig 13 november is Fred v.d. Boogaart oetgerope as 59ste Prins vanne Sjansemaekers. In ‘n gezellig La Rochelle waerdje hae nao väöre gehaoldj nao ‘n optraeje door Daan en Suus (zien dochters Susan en Daniëlle). Fred waerdj biegestaon door zien adjudante Thei, Wim en Roy. Hae zal äöver ‘t Sjansemaekersriek gaon regere ònger ziene spreuk

Neet inne kas of op ‘t veldj, mer väörop in ‘t vastelaovesgeweldj.